Qeveria ka mbajtur mbledhje të mbyllur në diskutimin për rezervat shtetërore. Kryeministri Albin Kurti deklaroi se ka ndërmarrë reforma dhe kanë siguruar buxhet shtesë. Sipas tij, qeveritë e kaluara kanë bërë planifikim të varfër për sigurimin e rezervave shtetërore.
Shefi i ekzekutivit në mbledhjen e sotme të kabinetit qeveritar kërkoi që diskutimet për këtë pikë të rendit të ditës të mbahen të mbyllura.
“Pika e pestë është shqyrtimi i propozimit të vendimit për plotësimin dhe ndryshimin e programit vjetor 2023 për rezervat shtetërore të mallrave për të siguruar mirëqenien e qytetarëve tanë. Kemi ndërmarrë një sërë reformash. Politikat tona janë reflektuar përmes plotësim ndryshimit të ligjeve duke siguruar kështu standard i caktuar minimal për avancimin e politikave. Ndër këto kemi siguruar edhe buxhet shtesë dukshëm më të lartë në krahasim me planifikimin e varfër të qeverive paraprake, për sigurimin e rezervave shtetërore. Buxheti i këtillë ka reflektuar edhe në kuptim të ndryshimit të programit vjetor të rezervave shtetërore të mallrave në dritën e këshillave në institucionet përgjegjëse të sigurisë të dhëna të këtilla nuk do të bëhen publike . Por, sipas legjislacionit përkatës në fuqi do të klasifikohen”, tha Kurti. /KosovaPress/
