Basketbollistët e Oklahoma City Thunder mposhtën bindshëm Denver Nuggets në ndeshjen e shtatë të gjysmëfinales së Konferencës Perëndimore, me rezultatin 125:93, duke siguruar kalimin në finalen e madhe të Perëndimit.
Me këtë fitore, Thunder përmbylli serinë me shifrat 4:3, duke eliminuar ish-kampionët e NBA-së dhe duke siguruar përballjen e radhës kundër Minnesota Timberwolves.
Denveri e nisi më mirë takimin dhe në çerekun e parë krijoi një epërsi prej 10 pikësh, por Oklahoma reagoi fuqishëm me një seri prej 13:0, duke përmbysur ndeshjen.
Pjesa e parë ishte e barabartë për pjesën më të madhe të saj, por në minutat e fundit Thunder mori kontrollin, duke krijuar një epërsi dyshifrore 54:43 dhe duke shkuar në pushim me avantazh 60:46.
Dominimi i vendasve u thellua në çerekun e tretë, kur përparësia arriti shpejt në mbi 20 pikë, duke e vulosur praktikisht fatin e ndeshjes dhe të serisë.
Heroi i Oklahomës ishte sërish Shai Gilgeous-Alexander, i cili realizoi 35 pikë, 4 asistime dhe 3 kërcime. Jalen Williams kontribuoi gjithashtu me 24 pikë dhe shtatë asistime.
Finalja e Konferencës Perëndimore midis Minnesota Timberwolves dhe Oklahoma City Thunder do të nisë natën mes të martës dhe të mërkurës.
Ndërkohë, në Konferencën e Lindjes në finale janë New York Knicks dhe Indiana Pacers. /Telegrafi/
