Gazetarja e televizionit turk TRT, Nafisa Latic ka njoftuar se ka zhvilluar një intervistë me kryeministrin e Kosovës, Albin Kurti, e cila do të transmetohet gjatë pasdites së sotme.
Megjithatë, gazetarja ka shpalosur disa prej deklaratave të Kurtit, i cili, sipas saj, ka deklaruar se nuk do ta lejojë kurrë formimin e një modeli si Republika Srpska në Kosovë.
“Në një intervistë ekskluzive për Across The Balkans, kryeministri i Kosovës ka thënë se do të vazhdojë të jetë pjesë e takimeve të nivelit të lartë për propozimin e BE-së dhe SHBA-së, por nuk do ta lejojë kurrë formimin e një tjetër Republika Srpska”, ka shkruar gazetarja Latic.
In an exclusive interview for #AcrosstheBalkans Kosovo’s PM says he’ll continue with high level meetings on the EU-US proposal but will never allow creation of another Republika Srpska and believes Belgrade still sees Bosnia, Kosovo and Montenegro as a temporary states. @trtworld pic.twitter.com/qtBmfIKfLj— Nafisa Latic (@Nafisa_Latic) February 3, 2023
Ajo ka thënë se gjatë intervistës, Kurti para saj ka deklaruar se Serbia i sheh ende Bosnjën, Kosovën dhe Malin e Zi si shtete të përkohshme.
Kryeministri Albin Kurti është pritur sot në një takim nga presidenti turk, Recep Tayip Erdogan, me të cilin kanë diskutuar mbi situatën aktuale në Ballkan dhe rritjen e bashkëpunimit ndërmjet Kosovës dhe Turqisë.
Erdogan ka bërë thirrje për arritjen e një marrëveshjeje të paqes ndërmjet Kosovës dhe Serbisë dhe ka shprehur vullnetin për të ndihmuar, nëse kjo gjë kërkohet nga palët.
/GazetaSinjali/
