Presidenti i Turqisë, Rexhep Tajip Erdogan, ka komentuar blerjen e avionëve F-35 nga SHBA dhe qëndrimin e Greqisë për këtë çështje, gjatë një deklarate për gazetarët që e shoqëronin në fluturimin e kthimit nga Azerbajxhani.
Sipas mediave të huaja, Erdogan ka theksuar se reagimi i Greqisë ndaj përpjekjeve të Turqisë në sektorin e mbrojtjes është i pajustifikuar.
“Shqetësimi i Greqisë për hapat që kemi ndërmarrë në sektorin e mbrojtjes është i papërshtatshëm dhe i pakuptimtë. Turqia nuk përbën kërcënim për asnjë vend që nuk kërcënon sigurinë dhe interesat e saj dhe nuk demonstron një qëndrim armiqësor ndaj saj”, ka deklaruar ai.
Presidenti turk gjithashtu ka bërë të ditur se ka biseduar me Donald Trump për çështjen e avionëve F-35, gjatë takimit të tyre në margjinat e Samitit të fundit të NATO-s. Ai ka shprehur shpresën se marrëveshja do të respektohet nga pala amerikane.
“Ne duam F-35 kryesisht për sigurinë tonë. Çështja e F-35 nuk është vetëm një çështje teknologjie ushtarake për ne, por edhe një çështje bashkëpunimi të fortë në nivel ndërkombëtar, siç është NATO. Sigurisht, kjo çështje na dha mundësinë të përshpejtojmë përpjekjet tona në industrinë e mbrojtjes. Forcimi i infrastrukturës sonë mbrojtëse nuk përbën kërcënim për askënd. Sidomos për miqtë dhe aleatët tanë”, ka thënë Erdogan.
Ai ka përmendur se edhe vetë Samiti i NATO-s ka nxitur vendet anëtare të rrisin investimet në mbrojtje, gjë që, sipas tij, e bën reagimin e Greqisë të pabazuar./Sinjali
