Në një konferencë të shkurtër për media pas takimit me presidentin e Serbisë, Aleksandër Vuçiç, nga Bulevardi “Leopold III” në Bruksel, në selinë e aleancës më të fuqishme ushtarake që ka njohur bota, udhëheqësi i saj, Jens Stoltenberg, theksoi se është e rëndësishme që tensionet në Veri të Kosovës të de-përshkallëzohen.
Prandaj, Stoltenberg, në prani të Vuçiç, u bëri thirrje atij dhe kryeministrit të Kosovës, Albin Kurtit, që të ulin tensionet në terren dhe të përmbahen nga veprimet dhe retorikat përshkallëzuese.
“Ne besojmë fuqimisht se e vetmja rrugë përpara është përfshirja në dialog, në dialogun e lehtësuar nga BE-ja, me mbështetjen e fuqishme të NATO-s. Serbia është një partner afatgjatë i NATO-s dhe ne besojmë se ju do të angazhoheni në këtë dialog në mënyrë konstruktive”, potencoi Stoltenberg.
Duke folur për Misionin e NATO-s në Kosovë, KFOR-in, Stoltenberg tha se ky mision i kryen detyrat e tij në mënyrë të paanshme.
“Siç e dini, NATO ka qenë atje për shumë vite me misionin tonë paqeruajtës, misionin e KFOR-it. Misioni ynë atje bazohet në një mandat të OKB-së. Ne e kryejmë misionin tonë atje në mënyrë të paanshme. Ne sigurojmë një mjedis të sigurt dhe të sigurt dhe lirinë e lëvizjes për të gjitha komunitetet”.
Ai i quajti si të papranueshme sulmin e huliganëve serbë ndaj pjesëtarëve të NATO-s më 29 maj në kulmin e tensioneve në Veri.
“Në maj, trupat tona u sulmuan dhe 93 u plagosën, tre prej tyre rëndë. Kjo është e papranueshme. NATO ka rritur praninë e saj me rreth 500 trupa në përgjigje të tensioneve të shtuara dhe vështirësive që shohim në veri të Kosovës. Ne do të vazhdojmë të sigurojmë që ta kryejmë mandatin tonë në mënyrë të paanshme dhe të sigurojmë që të kemi forcat në dispozicion për të zbatuar mandatin e OKB-së”.
/albanianpost/
