Kuvendi i Kosovës, këtë të shtunë, ka dal me një sqarim rreth pagesës së deputetëve të dorëhequr nga mandati ityre.
Sipas njoftimit, kur Kuvendi shpërndahet deputetët kanë të drejtën të kenë pagën kalimtare e cila rrjedh më së shumti deri në 12 muaj.
Por, e njëjta gjë nuk vlen edhe për deputetët që japin dorëheqje.
Sipas Kuvendit të Kosovës deputetët e dorëhequr nuk gëzojnë të drejtën për pagë deri në 12 muaj.
“Kur Kuvendi shpërndahet, qoftë pas mandatit të rregullt apo me ndërprerje të mandatit, deputetët e legjislaturës përkatëse gëzojnë të drejtën në pagë kalimtare deri në një sistemim të ri, më së shumti 12 muaj. Ndërsa kur deputeti jep dorëheqje, nga ajo ditë i pushojnë të gjitha të drejtat që mund të kishte përfituar si ish-deputet, përfshirë edhe pagën kalimtare deri në 12 muaj”, thuhet në sqarim.
Dhjetë deputetët të Listës Serbe, më 7 nëntor kishin dorëzuar dorëheqjet në Kuvendin e Kosovës.
Kjo pasi që më 5 nëntor, të njëjtit pas një mbledhjeje në Zveçan kishin vendosur të largoheshin nga Kuvendi i Kosovës.
Serbët nuk ishin larguar vetëm nga Kuvendi.
Ata u larguan edhe nga komunat, policia, gjyqësori, prokuroria, dogana etj. /Albanianpost.com
