Shefi i OKB-së konfirmon vijimësinë e marrëveshjes së grurit mes Rusisë dhe Ukrainës

Sekretari i Përgjithshëm i OKB-së Antonio Guterres konfirmoi të enjten se të gjitha palët kanë rënë dakord për të zgjatur marrëveshjen e ndërmjetësuar nga OKB për korridoret e grurit në Detin e Zi.

Kjo marrëveshje synon lehtësimin e krizës globale ushqimore pasi Rusia kishte hedhur dyshime mbi pjesëmarrjen e saj të vazhdueshme në marrëveshje.

“Unë mirëpres marrëveshjen e të gjitha palëve për të vazhduar Iniciativën e Drithërave në Detin e Zi për të lehtësuar lundrimin e sigurt për eksportimin e drithit, produkteve ushqimore dhe plehrave nga Ukraina”, tha Guterres në Twitter.

“Iniciativa tregon rëndësinë e diplomacisë diskrete në gjetjen e zgjidhjeve shumëpalëshe.”

Marrëveshja, e nënshkruar në korrik, do të skadonte të shtunën. Në një postim në Twitter, ministri ukrainas i Infrastrukturës Oleksandr Kubrakov tha se marrëveshja do të “zgjatet për 120 ditë”. /abcnews.al/