Shtetet e Bashkuara dhe Kina kanë rënë dakord për një kornizë për të zbatuar “armëpushimin e tyre tregtar”, thanë zyrtarët e të dyja palëve të mërkurën, pas përfundimit të dy ditëve bisedimesh në Londër për të ulur tensionet dhe për të lehtësuar kufizimet e eksportit që kërcënojnë të prishin prodhimin global.
Negociatorët amerikanë dhe kinezë ranë dakord “në parim” për një kornizë se si të zbatojnë konsensusin e arritur nga raundi i mëparshëm i bisedimeve në Gjenevë muajin e kaluar dhe një telefonatë midis udhëheqësve të të dy vendeve javën e kaluar, u tha negociatori tregtar i Kinës Li Chenggang gazetarëve në Londër, sipas transmetuesit shtetëror kinez CGTN.
Zyrtarët e të dyja palëve tani do ta çojnë propozimin përsëri te udhëheqësit e tyre për miratim, u tha gazetarëve në një konferencë të veçantë në Londër Sekretari i Tregtisë i SHBA-së Howard Lutnick, raportoi Reuters.
“Nëse kjo miratohet, ne do ta zbatojmë kornizën”, theksoi ai.
Ndërsa asnjëra palë nuk zbuloi ndonjë specifikë të marrëveshjes, Lutnick tregoi se të dyja palët kishin rënë dakord të hiqnin kontrollet e eksportit mbi mallrat dhe teknologjitë që janë thelbësore për tjetrën.
Kufizimet e Kinës mbi eksportet e mineraleve të rralla dhe magneteve në SHBA do të zgjidhen si një pjesë “themelore” e marrëveshjes kornizë, tha Lutnick, sipas Reuters.
Ndërkohë, Kevin Hassett, drejtor i Këshillit Ekonomik Kombëtar, i tha CNBC të hënën se administrata Trump mund të jetë e hapur për të lehtësuar kufizimet mbi disa mikroçipa që Kina i sheh si kritike për sektorin e saj të prodhimit.
SHBA-të do të mbajnë kufizime mbi çipat “të nivelit të lartë Nvidia” që janë të aftë të fuqizojnë sistemet e inteligjencës artificiale, shtoi ai. /Telegrafi/
