Shtëpia e Bardhë ka informuar Kongresin se dëshiron të dërgojë më shumë se 1 miliard dollarë armatim në Izrael. Paketa e re do të përfshijë raketa tankesh, mortaja dhe automjete taktike të blinduara.
Javën e kaluar, presidenti Joe Biden tha se do të ndalonte dërgesat e armëve në Izrael nëse ai do të fillonte një inkursion ushtarak në qytetin Rafah.
Të martën, tanket izraelite përparuan më thellë në zonat e banuara të Rafahut juglindor, teksa bombardime të fuqishme pati në disa zona.
Biden tha javën e kaluar se ai kishte vonuar dërgimin e bombave 900 kg në Izrael për shkak të mënyrës se si ato mund të përdoren në një operacion të tillë tokësor.
Paketa që i dërgohet Kongresit, është e para që kur administrata e Biden ndaloi transferimin e armëve në Izrael javën e kaluar.
Sipas agjencisë së lajmeve Associated Press, ajo do të përfshijë 700 milionë dollarë në municion tankesh, 500 milionë dollarë në automjete taktike dhe 60 milionë dollarë në predha mortajash.
Të premten, një raport i Departamentit Amerikan të Shtetit zbuloi se disa armë të prodhuara në Amerikë dhe që i janë dhëna Izraelit, mund të jenë përdorur në shkelje të ligjit ndërkombëtar .
Transferimet e armëve në Izrael janë bërë një detyrim politik për Biden përpara zgjedhjeve të këtij nëntori në Shtëpinë e Bardhë të 2024-ës./Associated Press/
