Krerët e diplomacisë ruse, iraniane dhe turke, lojtarë kyç në luftën në Siri, janë në “kontakt të ngushtë” për të stabilizuar situatën përballë ofensivës rebele, sipas Moskës, një aleate e regjimit sirian.
“Ministrat e jashtëm të tre vendeve garantuese të procesit të Astana-s, një format negocimi për Sirinë, Rusia, Irani dhe Turqia janë në kontakt të ngushtë”, tha të mërkurën zëdhënësja e diplomacisë ruse Maria Zakharova gjatë konferencës së saj javore.
Agjencia ruse Ria Novosti raportoi, duke cituar ambasadën iraniane në Moskë, se Mohsen Qomi, këshilltar për çështjet ndërkombëtare i liderit suprem iranian Ali Khamenei, ishte në kryeqytetin rus.
“Ne shpresojmë që të gjitha shtetet që kanë ndikim në situatën në terren në Siri do ta përdorin atë në interes të rivendosjes së sigurisë dhe stabilitetit në këtë vend sa më shpejt të jetë e mundur”, shtoi zyrtarja ruse.
Një koalicion rebelësh i udhëhequr nga grupi radikal islamik Hayat Tahrir al-Sham (HTS), nisi një ofensivë rrufe në veriperëndim të Sirisë më 27 nëntor, duke pushtuar dhjetëra qytete dhe një pjesë të madhe të Aleppo-s, qyteti i dytë i vendit, përpara se të vazhdonte avancimin drejt jugut.
Ai mbërriti të martën në portat e Hama-s, qyteti i katërt i vendit.
Me mbështetjen ushtarake të Rusisë, Iranit dhe lëvizjes libaneze pro-iraniane Hezbollah, regjimi kishte rimarrë një pjesë të madhe të vendit në vitin 2015 dhe në vitin 2016 të gjithë Aleppo-n, pjesa lindore e të cilit ishte marrë në vitin 2012 nga rebelët.
Një armëpushim i vendosur në vitin 2020, i sponsorizuar nga Ankaraja dhe Moska, kishte sjellë një qetësi të pasigurt në veriperëndim të vendit.
Lufta civile e Sirisë, e cila filloi në vitin 2011 me shtypjen brutale të protestave pro-demokratike nga forcat e presidentit Bashar al-Assad, ka lënë rreth gjysmë milioni njerëz të vdekur./Albanianpost.com
