Rama vendos stola prej guri para Kryeministrisë dhe përsërit thirrjen për dialog
Rusia ka shprehur gatishmëri për rifillimin e bisedimeve të paqes me Ukrainën dhe Shtetet e Bashkuara të Amerikës gjatë nëntorit, pas takimit të presidentit Vladimir Putin me të dërguarin amerikan Steve Witkoff.
Megjithatë, takimi i zhvilluar të mërkurën në Shën Petersburg nuk ka sjellë marrëveshje për armëpushim apo ndonjë lëshim konkret nga Moska, raportojnë Reuters dhe Le Monde.
Këshilltari i Kremlinit, Yuri Ushakov, deklaroi se Putin është shprehur parimisht i gatshëm për një raund të ri negociatash, të cilat do të përqendroheshin në çështjet e sigurisë së Rusisë dhe Ukrainës pas përfundimit të luftës.
Bisedimet ndërmjet Putinit dhe Witkoffit zgjatën pothuajse tri orë.
Sipas Ushakovit, i dërguari amerikan e informoi presidentin rus për diskutimet që kishte zhvilluar më herët në Oslo me presidentin ukrainas Volodymyr Zelensky dhe përfaqësues evropianë.
Ai tha se propozimet e paraqitura përmbanin disa qasje të reja, por sipas Moskës, ato nuk ofronin shumë elemente të dobishme për zgjidhjen e konfliktit.
Ndërkohë, presidenti ukrainas Volodymyr Zelensky ka shprehur mbështetje për negociata trepalëshe ndërmjet Ukrainës, SHBA-së dhe Rusisë.
Zelensky ka theksuar se një marrëveshje për përfundimin e luftës duhet të përfshijë garanci të forta sigurie për Ukrainën.
Përpjekjet diplomatike po zhvillohen në një periudhë tensionesh ndërmjet Kievit dhe Uashingtonit, ndërsa sulmet ruse ndaj territorit ukrainas vazhdojnë.
Sipas raportimeve, sulmet e fundit ruse kanë shkaktuar viktima dhe dëme në infrastrukturën energjetike të Ukrainës.
Pavarësisht sinjaleve për rifillimin e negociatave, mbetet e paqartë nëse palët do të arrijnë marrëveshje për ndalimin e luftimeve.
Bisedimet e fundit trepalëshe për përfundimin e luftës janë zhvilluar në shkurt të këtij viti. /KosovaPress/
