Agjencia Botërore Anti-Doping (Wada) thotë se është “kapur padrejtësisht” në një grindje midis SHBA-ve dhe Kinës, me tensionet e tyre gjeopolitike, që derdhen në skenën olimpike.
Notarët më të mirë të Kinës kanë qenë në qendër të vëmendjes pas një morie akuzash për doping, të ndjekur nga pretendimet e diskutueshme të SHBA-ve se Wada po e mbulonte atë.
Notarët kinezë, të cilët u nisën për në Paris, u testuan dy herë më shumë se disa vende të tjera për droga, gjë që, nga ana tjetër, ka nxitur akuzat për një komplot për të prishur performancën e tyre.
Wada tha në deklaratën e saj të martën se ishte kapur “në mes të tensioneve gjeopolitike midis superfuqive, por nuk ka mandat të marrë pjesë në këtë”.
“Disa individë [në SHBA] po përpiqen të fitojnë pikë politike thjesht mbi bazën se atletët në fjalë janë kinezë,” i tha BBC-së kreu i Wada për marrëdhëniet me median, James Fitzgerald. “Rezultati është se ka krijuar mosbesim dhe ndarje brenda sistemit antidoping”.
Një luftë tregtare, rivalitete gjeopolitike dhe miqësia e Pekinit me Rusinë kanë acaruar marrëdhëniet midis dy ekonomive më të mëdha në botë.
Nuk është për t’u habitur që disa nga këto tensione shfaqen në sportet konkurruese, por tani ato duket se po nxisin një pykë më të vështirë – dhe më të ashpër.
Javën e kaluar, Wada kishte thënë se po shqyrtonte veprime ligjore kundër homologut të saj amerikan, Usada, mbi akuzat “shpifëse”.
Ky i fundit kishte akuzuar Wada-n dhe agjencinë kineze kundër dopingut, Chinada, se ishin ndër “duart e pista në varrosjen e testeve pozitive dhe shtypjen e zërave të sinjalizuesve të guximshëm”.
Ligjvënësit amerikanë, gjithashtu, kanë akuzuar Wada-n për dështimin për të hetuar siç duhet akuzat për doping kundër notarëve kinezë. Dhe të martën ata prezantuan një projekt-ligj që do t’i jepte Shtëpisë së Bardhë fuqinë për të shkurtuar fondet për agjencinë.
“Kur anëtarët e kongresit dhe senatorët po futen në botën kryesisht teknike të anti-dopingut, ajo nuk ka të bëjë më me analiza shkencore dhe ligjore dhe ajo zhvendoset në sferën politike”, tha Fitzgerald. /Albanianpost.com
