“Këto zgjedhje nuk mund të njihen, sepse janë njohja e ndërhyrjes së Rusisë këtu, nënshtrimi i Gjeorgjisë ndaj Rusisë”, tha presidentja e Gjeorgjisë, Salome Zourabichvili. “Askush nuk mund t’ia heqë të ardhmen evropiane Gjeorgjisë,” shtoi ajo.
Presidentja e Gjeorgjisë tha të dielën se ajo nuk i njeh rezultatet e votimit parlamentar të kësaj fundjave , të cilat zyrtarët zgjedhorë thonë se u fituan nga partia në pushtet, duke shtuar se vendi ra viktimë e një “operacioni special rus” që synonte ta zhvendoste atë nga rruga drejt Evropë.
Duke qëndruar përkrah liderëve të opozitës, presidentja Salome Zourabichvili u bëri thirrje gjeorgjianëve të mblidhen të hënën mbrëma në Tblisi për të protestuar ndaj asaj që ajo e quajti një “falsifikim total, një vjedhje totale e votave tuaja”.
Lajmi ngre mundësinë e trazirave të mëtejshme politike në vendin e Kaukazit Jugor.
“Këto zgjedhje nuk mund të njihen, sepse janë njohja e ndërhyrjes së Rusisë këtu, nënshtrimi i Gjeorgjisë ndaj Rusisë,” tha Zourabichvili.
Komisioni Qendror i Zgjedhjeve të Gjeorgjisë tha të dielën se partia në pushtet Ëndrra Gjeorgjiane mori 54.8% të votave të së shtunës me pothuajse 100% të votave të numëruara.
Shumë gjeorgjianë e panë votimin e së shtunës si një referendum mbi mundësinë për t’u bashkuar me BE – pasi Brukseli kishte pezulluar procesin e anëtarësimit të Gjeorgjisë në BE për një kohë të pacaktuar për shkak të një ‘ligji të ndikimit të huaj’ të stilit rus të miratuar në qershor.
Fushata zgjedhore u dominua nga politika e jashtme dhe u shënua nga një luftë e ashpër për vota dhe akuza për një fushatë shpifjeje.
Vëzhguesit evropianë të zgjedhjeve thanë se zgjedhjet u zhvilluan në një mjedis “përçarës” të karakterizuar nga kërcënime dhe raste të blerjes së votës, votimit të dyfishtë dhe dhunës fizike./euronews/
