Gary Neville ka bërë thirrje që Premier League të ndryshojë rregullat e saj për fitimin dhe qëndrueshmërinë, në mënyrë që të lejojë Newcastle të shpenzojë si Manchester City.
Newcastle, së bashku me Chelsea, Nottingham Forest dhe Leicester City, po hasnin vështirësi për të përmbushur rregullat e Premier League për Fitimin dhe Qëndrueshmërinë (PSR) këtë verë dhe u detyruan të shisnin disa talente vendase për të shmangur sanksionet. Ndërsa Chelsea u nda me Conor Gallagher, Newcastle shiti Elliot Anderson dhe Yankuba Minteh. Sipas rregullave të PSR, të ardhurat që klubet angleze fitojnë nga shitja e lojtarëve të akademisë konsiderohen fitim i pastër në librat e tyre financiarë.
Ish-mbrojtësi i Manchester United, Gary Neville, u ka bërë thirrje ligës që të ndryshojë këto rregulla. Neville është kundër idesë që ekipet të ndahen nga lojtarët që vijnë nga sistemi i tyre i të rinjve dhe gjithashtu ka kundërshtuar rregullat që pengojnë Newcastle të shpenzojë shumë, pavarësisht se kanë pronarë jashtëzakonisht të pasur.
Duke folur për Sky Sports, ish-mbrojtësi i Manchester United tha, “Mendoj se ka qenë merkatoja e transferimeve më e çuditshme. Mendoj se PSR tani po fillon të zbatohet nga Premier League dhe për këtë arsye po shohim shumë klube, përfshirë Manchester United, që po përpiqen të manovrojnë duke shitur lojtarë që ndoshta nuk do të donin t’i shisnin. PSR nuk ishte projektuar kurrë për të detyruar klubet të shesin lojtarët më të mirë të akademisë dhe kjo është ajo që po shohim, prandaj diçka duhet të ndryshojë në mënyrë drastike gjatë 12 muajve të ardhshëm në lidhje me këto rregulla.”
Ai shtoi, “Gjithashtu, mendoj se Newcastle duhet të jetë në gjendje të investojë në skuadër. Sërish, PSR duhet të ndryshohet në mënyrë që të lejohet investimi nga pronarët, kështu që Newcastle të mund të arrijë nivelin e Manchester City dhe klubeve të tjera. Nuk mund t’i mbajmë klubet peng duke u thënë, ‘Nuk do të investoni’. Ajo që duhet të bëjmë është të veprojmë me siguri dhe qëndrueshmëri në mendje. Kjo do të thotë që financimi nga pronarët mund të duhet të ndodhë paraprakisht, por nuk mund të vazhdojmë të pengojmë Newcastle dhe aktualisht po i mbajmë peng.”
Liga e parë angleze është ndërprerë pas tre raundeve të ndeshjeve për shkak të pushimit ndërkombëtar dhe do të rifillojë më 14 shtator. /Goal.com/
