Nëse turistët marrin pjesë në aktivitete mjedisore gjatë vizitës së tyre në Kopenhagë, ata do të shpërblehen me ushqim dhe aktivitete falas, njoftoi administrata e kryeqytetit danez.
Në praktikë kjo do të thotë se atraksionet më të mëdha turistike ofrojnë shpërblime për mbledhjen e mbeturinave, udhëtimin me transport publik ose përdorimin e biçikletës si mjet transporti.
Çmimet variojnë nga një drekë falas, kafe ose gotë verë deri te qiratë më të lira të kajakut.
Është një fushatë provë e quajtur “Copenpay” (një kombinim i fjalës Copenhagen dhe “to pay” në anglisht), e cila fillon më 15 korrik, dhe synimi është të ulë ndikimin e turizmit në mjedis.
– Kur udhëton jashtë vendit, nëse fluturon ose shkon me makinë, ndot – thotë Ricke Holm Petersen nga Organizata e Turizmit në Kopenhagë.
Projekti bazohet në besim, që do të thotë se nuk ka gjasa që ndonjërit prej turistëve t’i kërkohet prova se ata kanë kryer realisht aktivitetet e kërkuara.
– Për disa atraksione ndoshta do t’ju duhet të tregoni një foto të vetes duke hipur në një biçikletë ose një biletë transporti publik – thotë Petersen.
Nëse autoritetet vlerësojnë se aksioni është i suksesshëm, ai do të shtyhet deri në fund të vitit./AlsatM
