Mbrojtësi shqiptar, Marash Kumbulla raportohet se është një hap larg rikthimit në dispozicion të Jose Mourinho-s pas një mungese të gjatë.
Pas përfundimit të rikuperimit nga një këputje e ligamentit te gjurit (ACL), Kumbulla do të rikthehet në pankinën e Roma-s në ditët në vijim.
Siç parashikohej nga vetë Mourinho në paraqitjet e tij të fundit në media, “Corriere dello Sport” konfirmon se Kumbulla mund të marrë thirrjen e tij të parë zyrtare pas disa muajsh qoftë në ndeshjen e ardhshme të ligës me Napoli-n ose në ndeshjen e fundit të vitit kundër Juventus-it më 30 dhjetor.
Rikthimi i Kumbullës do t’i japë Mourinho-s më shumë opsione në mbrojtje, gjë që, duke pasur parasysh largimin e afërt të Evan Ndicka në Kupën e Kombeve në Afrikë, dhe mungesën e zgjatur të Chris Smalling, do të jetë shumë e rëndësishme pasi Roma vazhdon kalendarin e saj të ngjeshur në disa gara.
Qendërmbrojtësi 23-vjeçar u detyrua të dilte nga fusha pas vetëm 15 minutash në barazimin 1-1 të Roma-s me Milan-in në fund të prillit. Dhe pas gati 240 ditësh, ai do të rikthehet sërish në fushën e blertë.
/albanianpost/
