Kryeministri Albin Kurti ka njoftuar se ka zhvilluar një bisede telefonike me zëvendësndihmës sekretarin amerikan të shtetit për Evropën dhe Euroazinë, Gabriel Escobar, ku kanë diskutuar për përkushtimin e Kosovës për dialogun parimor me Serbinë që çon drejt një marrëveshje ligjërisht të detyrueshme.
Kurti ka shkruar në Twitter se me Escobar kanë diskutuar edhe për rëndësinë e paqes, sigurisë dhe stabilitetit në rajon.
Zëvendësndihmëssekretari i Shteteve të Bashkuara për Çështje Evropiane dhe Euroaziatike, Gabriel Escobar, ka thënë se e mbështet procesin e dialogut Kosovë-Serbi.
Këtë e bën të ditur nga Zyra e Kryeministrit të Kosovës, me anë të një komunikate për media, në të cilën thuhet se Kurti kishte biseduar me Escobarin në telefon.
“Gjatë bisedës telefonike u diskutua edhe rreth bisedimeve ndërmjet Kosovës dhe Serbisë, të lehtësuara nga Bashkimi Evropian. Në lidhje me këtë, kryeministri Kurti tha se Kosova angazhohet për një dialog parimor, drejt një marrëveshjeje ligjërisht të obligueshme, në qendër të së cilës është njohja reciproke. Ndërkaq, zëvendësndihmëssekretari i Shteteve të Bashkuara për Çështje Evropiane dhe Euroaziatike, Escobar, u shpreh se ShBA-ja e mbështet këtë proces dhe është e përkushtuar që të ketë përparim drejt qëllimit final të tij”, thuhet në njoftim.
