Dogana e Kosovës dhe Policia e Kosovës kanë organizuar sot një aksion, me ç’rast kanë kontrolluar 11 subjekte tregtare në Prishtinë, Prizren e Gjakovë për luftimin e piraterisë dhe falsifikimit.
Lajmin e bëri të ditur për Telegrafin, zëdhënësi i Doganës së Kosovës, Adriatik Stavileci.
“Dogana e Kosovë, Drejtoria për Hetimin e Krimeve Ekonomike dhe Korrupsionit, Drejtoria e Hetimit të Krimeve Kibernetike dhe Inspektorati i Tregut si anëtarë të Task Forcës për luftimin e piraterisë dhe falsifikimit, pas pranimit të informatave dhe punës në teren për verifikim të informatave kanë zbuluar se subjektet tregtare posedojnë mallra që dyshohet se janë të falsifikuara.
Andaj, si rezultat i dyshimit institucionet e kompetente në bashkëpunim dhe koordinim të veprimeve konform kompetencave ligjore kanë planifikuar veprimet operative në terren dhe është zbatuar Plani Operativ, ku janë kontrolluar 11 subjekte tregtare në 3 regjione të Republikës së Kosovës (Prishtinë, Prizren dhe Gjakovë)”, tha Stavileci. /telegrafi/
