Golden Eagle Ylli triumfoi në mënyrë dramatike përballë Pejës me rezultat 104-107, në ndeshjen e tretë të serisë gjysmëfinale në play off-in e Superligës së Kosovës në basketboll.
Me këtë rast, “Xehtarët” e ngushtuan serinë e fitoreve të Pejës në 2-1.
Ndeshja dhe atmosfera ishte shumë e zjarrtë, bile deri në fund të takimit nuk dihej se kush ishte fituesi.
Mysafirët e nisën shumë më mirë sfidën duke e mbyllur çerekun e parë në epërsi prej nëntë pikëve, 25-14 rezultati. Në 10 minutëshin e dytë pejanët u rikthyen fuqishëm dhe arritën ta zbusin epërsinë deri në një, 42-43.
Pjesën e dytë e nisi mirë mirë kampioni në fuqi. Çerekun e tretë suharekasit e fituan me shifrat 29-19.
Ndërsa, çereku më dramatik ishte ai i fundit. “Shqiponjat” dhe “Xehtarët” luftuan fuqishëm deri në sekondin e fundit të ndeshjës.
Pavarësisht që 10 minutëshin e fundit e fitoi Peja, kjo nuk i mjaftoi për fitore pasi ishte e vështirë të thyhet epërsia e lartë që e kishte krijuar ekipi mysafir.
Më i dalluari në ndeshje ishte i sapo kthyeri nga lëndimi, Hernik Sirko i cili shënoi 22 pikë, 10 kërcime e 2 asistime, ndërsa për ekipin humbës Jalen Tate ishte më i miri me 23 pikë, 2 kërcime e 4 asistime.
Beteja e katërt gjysmëfinale ndërmjet Pejës dhe Yllit zhvillohet të shtunen në Suharekë nga ora 20:30.
/KlanKosova/
