Integrimi i shteteve të Ballkanit Perëndimor në Bashkimin Evropian është një ndër prioritetet kryesore të Italisë.
Kështu të paktën ka bërë të ditur ministri i Punëve të Jashtme të Italisë Antonio Tajani, gjatë Ministerialit të mbajtur në Taormina me rastin e 70-vjetorit të Konferencës së Messinës.
“Takimi i sotëm është i një rëndësie të veçantë, sidomos për të dërguar një mesazh të qartë për të gjitha vendet kandidate për anëtarësim në BE: për Italinë, ribashkimi është përparësi”, ka deklaruar Tajani.
Italia, sipas Tajanit, dëshiron të përshpejtojë procesin e anëtarësimit.
“Shqipëria, Serbia, Maqedonia e Veriut, Bosnja e Hercegovina dhe Kosova janë pjesë e këtij vizioni për një prani më të fuqishme evropiane në rajon. Ne duam të përshpejtojmë këtë proces”, ka shtuar ai.
Ndryshe ministrja në detyrë e Punëve të Jashtme të Kosovës, Donika Gërvalla, në një fjalim rasti në Takimin Ministror në Taormina, në 70-vjetorin e Konferencës së Messinës, ka deklaruar se e ardhmja evropiane nuk mund të ndërtohet mbi harresë selektive dhe standarde të dyfishta.
“Por, ndërtohet mbi kujtesën, drejtësinë dhe guximin për të qenë e drejtë dhe e barabartë me të gjithë”, ka shkruar ajo në platformën sociale, Facebook.
Ndër të tjera, Gërvalla ka potencuar se dhuna seksuale u përdor nga Serbia si armë lufte, ndaj grave, burrave e fëmijëve, si në Kosovë ashtu edhe në Bosnje e Hercegovinë e Kroaci.
E ndërsa viktimat mbeten me plagë të hapura, sipas Gërvallës, autorët e këtyre krimeve enden të lirë në Serbi, jo vetëm të pandëshkuar, por shpesh të shpërblyer me poste e privilegje.
“Ndërsa, institucionet ndërkombëtare të drejtësisë vazhdojnë të heshtin, heshtje kjo që rrezikon përsëritje të historisë”.
Gërvalla gjithashtu ka potencuar se ardhmja e Kosovës është në Bashkimin Evropian, por si pjesë e natyrshme e një Evrope që e njeh të kaluarën, mbron të vërtetën dhe ndërton paqe përmes drejtësisë. /Albanianpost.com
