Më shumë se 6 vjet nga arrestimi i tij në kuadër të një hetimi për korrupsion, ish-kryeministri i Portugalisë, Jose Socrates do të përballet me gjyqin, por vetëm për akuzat e pastrimit të parave dhe falsifikimit të dokumenteve.
Me një vendim që tronditi mbarë vendin, gjyqtari Ivo Rosa, i Gjykatës së Lartë Penale të Portugalisë, hodhi poshtë akuzat për korrupsion ndaj Socrates, për shkak të mungesës së provave.
“Diçka unike ndodhi sot. Të gjitha gënjeshtrat e mëdha të prokurorëve u zhbënë. Do të vazhdoj të luftoj edhe për akuzat e mbetura”, u shpreh Jose Socrates, ish-kryeministër i Portugalisë.
Gjyqtari i çështjes deklaroi se “argumentet e prokurorëve janë bazuar tek spekulimet dhe fantazia”.
Rosa hodhi poshtë edhe akuzat për evazion fiskal që rëndonin ndaj Socrates, i cili do të gjykohet vetëm për pastrimin e 1.7 milionë eurove, falsifikim dokumentesh lidhur me tenderët publikë, si dhe blerjen dhe dhënien me qira të një apartamenti në Paris.
Vetë Socrates ka mohuar çdo shkelje, duke e quajtur hetimin në ngarkim të tij të motivuar politikisht.
Ndërkohë, biznesmeni Carlos Santos Silva, një mik i ish-kryeministër i akuzuar se ka vepruar si ndërmjetës në marrëveshjet, do të përballet gjithashtu me proces gjyqësor.
