Asociacioni i Komunave të Kosovës, nuk e ka pranuar zyrtarisht kërkesën për anëtarësim nga komuna e Mitrovicës së Veriut.
Lajmin e ka bërë të ditur kryetari i këtij Asociacioni, Sazan Ibrahimi, i cili ka sqaruar se nuk e kanë pranuar një vendim të tillë pasi që akoma nuk është shqyrtuar nga Ministria.
“Ne kemi kuptuar që Kuvendi Komunal i Mitrovicës së Veriut e ka marrë vendimin, ku ka shpallur gatishmërinë për anëtarësim në Asociacionin e Komunave të Kosovës, mirëpo rregullat janë që çdo vendim i Kuvendit Komunal duhet të dërgohet në Ministrinë e Administrimit të Pushtetit Lokal për shqyrtim të ligjshmërisë”.
Ibrahimi, ka potencuar se janë në pritje të kërkesës zyrtare.
“Tash nuk e di se çka ka ndodhur në këtë relacion dhe neve jemi të hapur po as ta pranojmë këtë kërkesën zyrtare të cilën ai ka dhënë dritën e gjelbër edhe Ministria, Bordi i Asociacionit do e shqyrtojë kërkesën, pastaj Kuvendi do të marrë vendim sa i përket kësaj çështje”.
“Zyrtarisht akoma nuk kemi pranuar një kërkesë nga Mitrovica e Veriut, përveç kërkesën fillestare ku ka treguar gatishmërinë për anëtarësim në Asociacion”.
Teksa është shprehur i bindur se MAPL-ja do të ketë “përgjigje pozitive”.
“Sepse procedurat janë respektuar në plotësi, mirëpo këto janë rregullat ligjore dhe tani po as ta kthej MAPL te Komuna po shpresoj që ata do e dërgojnë kërkesën te ne dhe pastaj Bordi dhe Kuvendi do ta shqyrtojë atë”.
Më 30 qershor, Komuna e Mitrovicës së Veriut, ka marr vendim që t’i bashkohet Asociacionit të Komunave të Kosovës.
Vendimi në fjalë u morr gjatë një seance të Kuvendit Komunal të Mitrovicës së Veriut.
Asociacioni i Komunave të Kosovës është formuar në vitin 2001 pas zgjedhjeve të para demokratike komunale.
Themelimi i Asociacionit të Komunave të Kosovës është mbështetur në nenin 10 të Kartës Evropiane të Vetëqeverisjes Lokale në kuadër të Këshillit të Evropës.
/albanianpost/
