Hapet panairi “Gratë në Biznes”

Për tri ditë radhazi në Prishtinë, rreth 40 biznese do të promovojnë punimet e tyre në panairin “Gratë në Biznes”. Në sheshin e kryeqytetit janë bërë bashkë gra nga e gjithë Kosova për të ekspozuar punën e tyre të dorës por edhe ushqime të ndryshme tradicionale. Në hapje të panairit ka marrë pjesë edhe ministrja e Industrisë, Ndërmarrësisë dhe Tregtisë, Rozeta Hajdari, e cila tha se po punojnë në legjislacion për të forcuar ndërmarrësinë.

Ministrja Hajdari u bëri thirrje grave që të aplikojnë për grante, por shtoi se po forcojnë ndërmarrësinë me hartimin e ligjeve.

“Tani për tani Ministria e Industrisë, Ndërmarrësisë dhe Tregtisë ka lansuar grant skemën për artizanatet, për punëdoret e juaja që sot po i ekspozoni dhe keni mundësinë të aplikoni në Ministrinë e Industrisë, Ndërmarrësisë dhe Tregtisë përmes programeve që janë në sistemin elektronik por t’i ndihmoni njëra-tjetrës edhe për plotësim të aplikacioneve sepse janë afër gjysmë milioni euro vetëm për ju, për të tjera që do të aplikojnë sipas konkurrencës. Me Ligjin për Artizanatet, me ligjet tjera për turizmin, politikën industriale dhe 20 ligjet tjera jemi duke forcuar ndërmarrësinë dhe më shumë inovacionin në ndërmarrësi, duke ditur që ka shumë kreativitet dhe inovacion të ndërmarrësit tanë të vyeshëm”, tha ministrja Hajdari.

Sevdie Ramadani ka bërë bashkë modernen me motive të vjetra. Ajo është menaxhere tash e 15 vjet në shoqatën “Gora”, ku me punimet e saj do të kenë mundësi të njoftohen për tri ditë qytetarët nga Prishtina.

“Që 15 vjet e kemi shoqatën, merrem me artizanate me punime punë dore, me qilima, mbulesa për tavolinë, qanta, kuleta, shputa, çorape, krejt çka është punë dore…Edhe rinia edhe njerëzit që janë në mërgatë që jetojnë jashtë janë shumë të interesuar për gjëra me motive të vjetra. Krejt produktet që i kemi nxjerrë prej qilimave dhe motivet çka kanë qenë të vjetra edhe kemi bërë të barabartë të vjetrën me modernen diçka edhe ka dal shumë e bukur”, tha ajo.

Ndërkaq, Mehreme Gashi ka nisur që dy muaj një biznes me ushqime tradicionale.

“Vij prej komunën së Skenderajt. Ne e kemi fituar një grant prej Komunës së Skenderajt për ushqime tradicionale, ja kemi filluar tash e dy muaj…Ne kemi sjellur bakllavë, fli, laknurë, kungullor, djathë, krejt bio…për momentin pak vështirë se nuk jemi mësuar e tash inshallah marrim hapa të mëtutjeshëm”, u shpreh ajo. /KosovaPress/

Read Previous

Konjufca pret në takim lamtumirës Szunyogun

Read Next

Nagavci: Nuk ka shkelje në financa në vlerën e teksteve mësimore