Pandemia e COVID-19 solli një lehtësim të përkohshëm për banorët lokalë nga mbingarkesa e turistëve, por tani, ata po përballen përsëri me nervat e lodhura për shkak të sjelljes problematike të vizitorëve.
Në qytete të ndryshme të Spanjës, Italisë, Portugalisë dhe Greqisë, aktivistët dhe banorët vendas kanë dalë në rrugë, disa të armatosur me pistoleta uji, duke u kërkuar turistëve të zhurmshëm të largohen. Protestuesit pohojnë se mbingarkesa turistike po rrit çmimet e banesave dhe po shkakton mungesa të ujit.
Në qendrat urbane të prekura nga thatësira si Barcelona, turistët konsumojnë më shumë ujë se banori mesatar. Në Sicili, disa qytete kanë filluar të largojnë turistët për shkak të mungesës së ujit. Megjithatë, qeveritë nuk kanë marrë masa të qëndrueshme për të zgjidhur situatën. Turizmi mbetet një shtyllë kryesore e ekonomisë për shumë vende të BE-së, veçanërisht në Evropën Jugore.
Pas pandemisë, njerëzit filluan të udhëtojnë masivisht, duke rikuperuar udhëtimet e humbura, çka rezultoi në një rritje ekonomike për disa vende si Spanja, Portugalia dhe Greqia. Në Palma de Mallorca, rreth 20 mijë aktivistë u mblodhën në fund të korrikut për të kërkuar një ndryshim në modelin turistik që po dëmton Ishujt Balearik. Në vitin 2023, numri i turistëve në ishujt u rrit në 14.4 milion, një numër dërrmues për një popullsi prej 1.2 milion banorësh.
Në Barcelonë, aktivistët përdorën pistoleta uji për të protestuar kundër turistëve, veprim që u kritikua nga Ministri i Turizmit të Spanjës. Gjithashtu, në rrugët e Spanjës janë vendosur ngjitëse dhe mbishkrime kundër turistëve që nuk respektojnë ligjet dhe kulturën lokale. Protesta të ngjashme kundër turizmit janë zhvilluar edhe në Madrid, Malaga, Granada dhe Alicante, si dhe jashtë Spanjës në vende si Portugalia, Italia dhe Greqia.
Qytetet evropiane kanë ndërmarrë masa të ndryshme për të luftuar mbi-turizmin, nga ndalimi i selfie-ve në Portofino të Italisë, deri te kufizimi i anijeve të mëdha turistike në Dubrovnik dhe Santorini. Në Venecia, është vendosur një tarifë prej 5 € për të kufizuar numrin e turistëve, çka ka shkaktuar protesta nga vendasit që e konsiderojnë qytetin si një park tematik. Kryetari i Bashkisë së Barcelonës njoftoi se qyteti do të mbyllë qiratë afatshkurtra të apartamenteve për turistët deri në vitin 2028 për të adresuar mungesat e banesave në Evropë. /Albanianpost.com
