Komisioni i Pavarur i Mediave ka reaguar mbi sulmin që i është bërë Televizionit Syri.
Reagimi i plotë:
Reagim i KPM-së për ngjarjen në televizionin Syri Vizion.
Komisioni i Pavarur i Mediave dënon ashpër sulmin e mbrëmshem ndaj televizionit Syri Vizion, duke e konsideruar atë një akt të papranueshëm që cenon punën e mediave dhe njëkohësisht lirinë e shprehjes.
Liria e medias është një shtyllë themelore e demokracisë dhe çdo përpjekje për të penguar punën e gazetarëve është e dëmshme për shoqërinë dhe zhvillimin demokratik të vendit tonë.KPM u bën thirrje institucioneve kompetente që të marrin masa të menjëhershme për të vënë autorët e këtij sulmi para drejtësisë, në mënyrë që të ofrohet ambient i sigurt për të ushtruar profesionin e gazetarisë. Sigurimi i një mjedisi të qetë dhe të mbrojtur për gazetarët është thelbësor për funksionimin e lirë dhe të pavarur të medias.
KPM inkurajon të gjitha mediat që të vazhdojnë me përkushtim misionin e tyre, duke kontribuar në informimin e publikut dhe forcimin e demokracisë. Media e lirë dhe e pavarur është në interes të gjithë shoqërisë dhe duhet mbështetur pa kushte.
