Krahas luftës me armët tradicionale, mes palëve vijoi të premten edhe lufta me deklarata. Me një mesazh në rrjetin “X”, lideri suprem iranian Ali Khamenei u shpreh se armiku zionist po ndëshkohet.
Ndërsa kryeministri Benjamin Netanyahu deklaroi se do ta ndalë programin bërthamor të Iranit me apo pa mbështetjen e Shteteve të Bashkuara.
“Objektivi ynë i parë është të ndalim programin bërthamor iranian, të eleminojmë rrezikun. Ndërsa i dyti të ndalim kapacitetet balistike të Iranit. Nëse Trump do të bashkohet apo jo, ky vendim i takon atij. Ai do të bëjë çfarë është e mirë për Shtetet e Bashkuara, ndërsa unë do të bëj çfarë është më mirë për Izraelin”, tha Netanyahu.
Vetë Trump deklaroi se lidhur me ndërhyrjen e mundshme në konfliktin Izrael-Iran do të vendosë brenda dy javësh.
Sipas shefit të diplomacisë britanike, David Lammy, deklarata në fjalë do të thotë se dy vendet do të kenë të paktën dy javë kohë për të arritur një zgjidhje diplomatike.
Opsioni në fjalë u mbështet edhe nga presidenti turk Recep Tayyip Erdogan, në një mesazh dërguar kancelarit gjerman Friedrich Merz përpara takimit mes përfaqësues të vendeve evropiane dhe atyre të Republikës Islamike.
Ndërkohë, para takimit në fjalë ministri i Jashtëm iranian, Abbas Araghchi deklaroi se nuk do të kishte asnjë negociatë me Shtetet e Bashkuara pa u ndalur më parë bombardimet izraelite.
Duke u përfshirë në debat, një ditë pasi paralajmëroi Uashingtonin që të mos përfshihej në luftë, Moska u shpreh kundër vrasjes së liderit suprem iranian.
“Vrasja e Ajatollah Ali Khamenei do të hape vazon e Pandorës”, paralajmëroi zëdhënësi i Kremlinit, Dmitry Peskov. /Euronews.al/
