Ish-kancelarja gjermane, Angela Merkel ka kritikuar ashpër partinë e saj të qendrës së djathtë kristian-demokrate (CDU) për miratimin e një mocioni në parlament që bën thirrje për reforma të vijës së ashpër në politikën e migracionit, së bashku me mbështetjen e Alternativës së ekstremit të djathtë për Gjermaninë (AfD).
Në një deklaratë të lëshuar sot nga zyra e saj, Merkel, e cila udhëhoqi Gjermaninë midis viteve 2005 dhe 2021, kritikoi vendimin për të mundësuar një shumicë me votat e AfD për herë të parë në një votim në Bundestag.
”Kreu i CDU-së, Friedrich Merz u angazhua për të shmangur miratimin e legjislacionit në Bundestag me ndihmën e AfD-së”, kujtoi Merkel.
”Ky propozim dhe qëndrimi i lidhur me të ishte shprehje e përgjegjësisë së madhe politike kombëtare, të cilën unë e mbështes plotësisht”, tha ish-kancelarja.
Migrimi është bërë tema mbizotëruese në fushatën zgjedhore gjermane përpara votimit më 23 shkurt, pas një sërë sulmesh që iu atribuohen të dyshuarve me prejardhje emigrantësh.
Merkel kërkoi “që të gjitha partitë demokratike të punojnë së bashku përtej kufijve politikë partiakë, jo si një manovër taktike, por me ndershmëri, në mënyrë të moderuar dhe mbi bazën e ligjit evropian në fuqi, për të bërë gjithçka që është e mundur për të parandaluar sulme të tilla të tmerrshme”. /ATSH-DPA/
