Policia e Kosovës ka bërë me dije të mërkurën se po heton vdekjen e dyshimtë të tre personave në Dyz, Shtime dhe Leposaviq. Trupat e tyre, siç bëhet e ditur, janë dërguar në Institutin e Mjekësisë Ligjore për obduksion.
Në fshatin Dyz, një burrë kishte shfaqur probleme shëndetësore të mërkurën mbrëma. Ai ishte dërguar për trajtim në Qendrën Klinike Universitare të Kosovës, ku më pas kishte vdekur.
Një tjetër burrë ishte dërguar në emergjencën e Shtimes rreth orës njëzet e dy e tridhjetë minuta. Mjeku kujdestar kishte konstatuar vdekjen e tij.
Ndërkohë, në Leposaviq është raportuar një rast i cilësuar si “vdekje e dyshimtë”. Njësitë policore dhe ekipi mjekësor kishin dalë në vendin e ngjarjes rreth orës shtatë. Aty ishte konstatuar vdekja e një gruaje.
Policia nuk ka dhënë hollësi për rrethanat e këtyre rasteve. Me vendim të prokurorëve, trupat janë dërguar për obduksion, ndërsa hetimet po vazhdojnë. /KosovaPress/
