Prej të hënës kur edhe u vendos masa e reciprocitetit, janë lëshuar 1 mijë e 455 targa provuese në të gjitha pikat e kalimit kufitar.
Ministria e Punëve të Brendshme (MPB) ka bërë të ditur se Policia e Kosovës bazuar në detyrat dhe autorizimet e saj është duke vazhduar të ndërmarrë veprimet policore në nivel vendi.
“Ministria e Punëve të Brendshme, Policia e Kosovës bazuar në detyrat dhe autorizimet e saj është duke vazhduar ndërmarrjen e veprimeve policore në nivel vendi, përfshirë të gjitha pikat e kalimit kufitarë me qëllim të zbatimit të marrëveshjes për lëvizjen e lirë-konkretisht targave të automjeteve, ku gjatë 24 orëve të fundit ministria ka lëshuar 1.455 targa provuese. Policia e Kosovës në vazhdimësi është kujdesur për ruajtjen e rendit dhe sigurisë publike si dhe ka ndërmarrë të gjitha masat e nevojshme operative dhe logjistike që të mundësojë lëvizjen e lirë të njerëzve dhe të mallrave në nivel vendi”, thuhet në komunikatën për medie nga MPB.
Ndërkohë që qytetarët të cilët kanë planifikuar të shfrytëzojnë pikat kufitare në Bërnjak dhe Jarinjë iu është bërë thirrje që të shfrytëzojnë pika tjera kufitare për qarkullim.
“Me qëllim të mundësimit të qarkullimit të lëvizjes së lirë, njoftohen qytetarët të cilët planifikojnë të shfrytëzojnë pikat kufitare në Bërnjak dhe Jarinjë, që mundësisht të shfrytëzojnë pikat tjera kufitare për qarkullim, për shkak të krijimit të pengesave të mundshme”, thuhet mes tjerash në komunikatë.
Ministria e Punëve të Brendshme, Policia e Kosovës vlerësojnë situatën e qetë dhe pa incidente, ndërsa angazhimi dhe realizimi i detyrave policore do të vazhdoj në interes të ruajtjes së rendit, qetësisë dhe sigurisë publike në vend.
