Kryeministri në detyrë i Kosovës, Albin Kurti i ka bërë thirrje Brukselit që ta bëjë planin për anëtarësimin e gjashtë vendeve të Ballkanit Perëndimor në NATO dhe në Bashkimin Evropian pa Serbinë.
Kurti në mbledhjen e këshillit të përgjithshëm të Lëvizjes Vetëvendosje, tha se regjimi autoritar në Serbia po e lë popullin e saj mbrapa, teksa e shtyp përfundi.
“Serbia e ka qartësuar orientimin e saj së fundmi, madje edhe për ata që duan t’i mbyllin sytë. Qifti Putin-Kirin në Moskë, e ka miniaturën e saj në Beograd te qifti Vuçiq”, tha ai.
Ai pati edhe një thirrje për Brukselin.
“Ne jemi më të fortë se kurrë por na duhet ta pranojmë që ne po e pësojmë më së shumti në rrugën e integrimeve nga Serbia dhe ky pësim nuk është i kufizuar vetëm te ne por i gjithë rajoni, andaj i bëjmë thirrje Brukselit, si kryeqytet perëndimor e demokratik, i Bashkimit Evropian e i NATO-s, që ta bëjë planin për anëtarësimin e Ballkanit Perëndimor, komplet në NATO dhe në Bashkimin Evropian pa Serbinë. Pra gjashtë shtetet e Ballkanit Perëndimor, minus Serbia”, tha ai. /KosovaPress/
