Presidenti i Ukrainës, Volodymyr Zelensky, ka bërë thirrje për një përgjigje të koordinuar ndërkombëtare kundër Rusisë, Iranit dhe Koresë së Veriut, duke i akuzuar këto vende për bashkëpunim në përshkallëzimin e kërcënimeve globale, përfshirë armët bërthamore dhe sulmet me dronë, shkruan Gazeta Sinjali.
Në fjalimin e tij të përditshëm me video nga Kievi, të enjten, Zelensky deklaroi se “Rusia tani po përpiqet të shpëtojë programin bërthamor të Iranit”, duke iu referuar si sinjaleve publike ashtu edhe veprimeve jopublike të Moskës.
Sipas tij, sa herë që një nga partnerët e Rusisë gjendet nën presion ndërkombëtar, Kremlini përpiqet të ndërhyjë për ta mbështetur. Ai paralajmëroi se bashkimi i këtyre vendeve agresore duhet të parandalohet me masa të forta.
Zelensky komentoi edhe propozimin e fundit të presidentit rus Vladimir Putin për të ndihmuar Iranin në përdorimin “paqësor” të energjisë bërthamore, duke e konsideruar këtë si një përpjekje për të shmangur ndalimin e armatimit bërthamor.
Ai theksoi se dronët iranianë Shahed dhe raketat balistike të përmirësuara të Koresë së Veriut po përdoren nga Rusia për të goditur qytetarët ukrainas. “Kjo tregon qartë se solidariteti dhe presioni global nuk janë të mjaftueshme. Ne duhet të shtrëngojmë ndjeshëm sanksionet”, u shpreh ai.
Zelensky foli pas vizitës në një bllok banimi të shkatërruar në Kiev, ku dy ditë më parë humbën jetën 23 persona nga një sulm raketor rus. Në total, rreth 30 persona vdiqën në sulmet ajrore të fundit në kryeqytet dhe qytete të tjera të Ukrainës.
“Kjo është formë e pastër terrori, e organizuar nga ushtria ruse nën drejtimin e Putinit,” përfundoi ai.
