Gjatë hapjes së samitit të katërt të Platformës së Krimesë, Zelenskyy tha se Ukraina u bë një objektiv për Rusinë kur Rusia aneksoi Krimenë në 2014.
Presidenti ukrainas Volodymyr Zelenskyy bëri thirrje për mbështetje maksimale nga 60 pjesëmarrësit në Samitin e Katërt të Platformës së Krimesë në Kiev.
Ai u kujtoi përfaqësuesve të pranishëm se lufta filloi me pushtimin e Krimesë, duke shtuar se liria e saj është thelbësore për paqen e qëndrueshme në Ukrainë.
Zelenskyy përsëriti parakushtet e tij për paqen në Ukrainë, të cilat ai tha se përfshinin “asnjë pushtim të ngrirë” ose “njerëz të mbetur në robëri”.
Samiti u iniciua nga Zelenskyy në vitin 2021 dhe fokusohet në përpjekjet për të rimarrë gadishullin e Krimesë, i cili ka qenë nën pushtimin rus që nga viti 2014.
Samiti i këtij viti u ndoq nga presidenti i Lituanisë Gitanas Nausieda, kryeministri kroat Andrej Plenković dhe kryeministrja letoneze Evika Silinja midis 60 përfaqësuesve nga vende të ndryshme dhe organizata ndërkombëtare.
Në një video-mesazh drejtuar samitit, presidenti turk Recep Tayyip Erdoğan përsëriti mbështetjen e tij për Ukrainën dhe kthimin e gadishullit të Krimesë të aneksuar nga Rusia.
Erdogan, i cili dikur u quajt një “mik i dashur” nga presidenti rus Vladimir Putin, tha se duhet të ndërmerren hapa shtesë për të garantuar të drejtat e turqve tatarë të Krimesë.
Forcat ruse hynë në Krime në vitin 2014 dhe e aneksuan rajonin dy muaj më vonë, me Putinin që e ndau atë në dy subjekte federale të Federatës Ruse.
Tatarët e Krimesë, një grup etnik turk indigjen në Krime, i kanë rezistuar kryesisht Moskës, duke bërë thirrje për t’i dhënë fund okupimit të Rusisë./euronews/
