Koha e prezantimeve ka përfunduar te Ferrari, që ka nisur nga puna për të përgatitur një makinë të shpejtë për dy pilotët e saj. Në krah të Charles Leclerc këtë vit do të jetë Lewis Hamilton, 7 herë kampion bote në Formula 1.
Këtë javë, piloti britanik bëri prezantimin dhe ka provuar një Ferrari, ndërkohë që në Fabrikë punohet për të qenë gati për mesin e marsit, kur nis sezoni i ri. Drejtori sportiv i “kokëkuqes” Frederic Vasseur, shpreson shumë këtë sezon.
“Pilotët bënë disa xhiro për t’u ambientuar, për të gjetur sadopak ritmin dhe të mësohen me pistën. Ishte gjithashtu një ngrohje e dobishme për të gjithë ekipin. Tani do të presim deri në testet dimërore”, tha Vasseur.
Më tej, vasseur shtoi: “Tani shpresojmë që të gjithë komponentët të bashkohen dhe të formojmë një makinë të shpejtë e fituese. Po punojmë shumë që t’u japim pilotëve një makinë konkurruese, që të na japë të gjithëve gëzime. Tifozët e meritojnë”. /Telesport.al/
