Trump nuk planifikon të shkojë në Turqi për bisedimet e armëpushimit mes Rusisë dhe Ukrainës, thonë zyrtarë të Shtëpisë së Bardhë.
Presidenti amerikan, Donald Trump nuk ka në plan të udhëtojë drejt Turqisë këtë javë për të marrë pjesë në bisedimet për një armëpushim mes Rusisë dhe Ukrainës, kanë bërë të ditur për CNN dy zyrtarë të Shtëpisë së Bardhë.
Kjo deklaratë zyrtare vjen pas disa ditësh spekulime dhe raportimesh të mediave ndërkombëtare se Trump mund të bashkohej me presidentin rus, Vladimir Putin dhe presidentin ukrainas, Volodymyr Zelensky në tryezën e negociatave në Stamboll.
Sipas zyrtarëve amerikanë, megjithëse presidenti e kishte shqyrtuar mundësinë për të ndryshuar agjendën e tij zyrtare në Lindjen e Mesme – një itinerar që ishte përgatitur me shumë kujdes dhe koordinim nga stafi i tij për javë të tëra – ai ka vendosur të qëndrojë besnik ndaj planit fillestar.
Ishte përmendur mundësia që 78-vjeçari të anulonte disa ndalesa të planifikuara dhe të shtonte një vizitë të papritur në Turqi me synimin për të marrë një rol aktiv si ndërmjetës në përpjekjet diplomatike për t’i dhënë fund luftës së vazhdueshme mes Moskës dhe Kievit.
Aktualisht, presidenti amerikan po zhvillon një tur diplomatik në Lindjen e Mesme. Ai qëndroi së fundi në Katar dhe pritet të vizitojë gjithashtu Abu Dabin në Emiratet e Bashkuara Arabe. Qëllimi kryesor i këtij turi është forcimi i marrëdhënieve dypalëshe, rritja e bashkëpunimit ekonomik dhe diskutimet për stabilitetin rajonal.
Në anën tjetër, presidenti ukrainas Volodymyr Zelensky ka konfirmuar pjesëmarrjen e tij në bisedimet që pritet të mbahen në Stamboll, duke shprehur gatishmërinë për të kërkuar një rrugëdalje diplomatike nga konflikti. Ndërkohë, presidenti rus Vladimir Putin, të paktën deri në këtë moment, ka refuzuar ftesën për të marrë pjesë fizikisht në negociata, duke shtuar pasigurinë rreth ecurisë së këtyre bisedimeve.
Pavarësisht mungesës së Trump në tryezën e bisedimeve, zhvillimet e fundit mbeten një moment i rëndësishëm në përpjekjet ndërkombëtare për paqe, me vëmendjen e mbarë botës të përqendruar në Turqi, si një ndër vendet pritëse me histori të gjatë ndërmjetësimesh në konflikte ndërkombëtare.
/Telegrafi/
