Aksidentohet një kamion me një veturë në Gjakovë, lëndohet një person
Kryetari i Federatës Sindikale të Punëtorëve Teknik të Sektorit Privat të Kosovës, Jusuf Azemi ka kërkuar nga Ministri i Shëndetësisë, Arben Vitia që punëtorët teknik të Shërbimit Spitalor Klinik dhe Universitar të Kosovës të jenë nën menaxhimin e Ministrisë. Këtë dhe disa kërkesa të tjera, Azemi i bëri sot në një takim me ministrin Vitia.
Pasi takimi ishte i mbyllur për media, Ekonomia Online, ka marrë një deklaratë nga Azemi, i cili ka thënë se kanë kërkuar që këta punëtorë të jenë nën menaxhim të Ministrisë dhe se paga e tyre të jetë 450 euro.
“Kërkesat tona të cilat ia thamë edhe gojarisht po normal që edhe me shkresë të përgatitur e kemi lënë në tavolinë te ministrit që ai me dashamirësi e mori. Si gjithherë kërkesë prioritare ka qenë paga të cilën këta punëtorë e marrin dikun rreth 280 euro. Ne kemi bërë kërkesë që të jetë 450 euro pasi që është shumë e vërtetë që shumë kompani të tjera tek ne kanë ardhur në sindikatë dhe kanë premtuar kanë ofruar që qysh nesër mund të pranojmë punëtor teknik me pagën 450 euro me transport dhe ushqim që në një formë ne kemi ofru ofertën tonë që nëse nuk do të jemi të kënaqur me shumën e pagës atëherë është versioni tjetër që është një version i gatshëm qysh nesër”, u shpreh Azemi.
Ai tha se punëtorët teknikë nuk janë trajtuar si duhet. Prandaj, sipas tij pagat e tyre janë të pamjaftueshme.
Kërkesë tjetër e tij ishte edhe ofrimi i një shujte ditore për punëtorët teknikë si dhe ofrimin e përkujdesjes mjekësore.
“Problemet kryesore kanë qenë paga si gjithherë, ka qenë kërkesë që punëtorët teknik të kompanive privatë që kryejnë shërbime nëpër spitale në moment kur simulohet stafi mjekësor i çdo spitali të stimulohemi edhe ne pasi që ne punojmë në të njëjtin vend, kemi kërkuar që të njihet stazhi i punës, të hiqet participimi i punëtorëve që punojnë nëpër spitale në momentin kur ata kanë ndonjë kontrolle në spitalet e Kosovës atëherë nuk do të jenë të obliguar që të bëjnë participim pasi që ata në një formë janë edhe vetë punëtor të spitalit dhe ka qenë një kërkesë e jona që këtyre punëtorëve tu mundësohet shujta në kuzhinat të cilat përgatitet ushqimi në QKUK”, u shpreh tutje Azemi.
“Të gjitha kërkesat që i kemi ofruar ne, kanë qenë të arsyeshme edhe para ministrit por megjithatë disa kërkesa kanë implikime buxhetore me çka është deklaru se në takimin e parë të premten që do të ketë me ministrin e financave do të merret me këtë çështje dhe është mbet që në fund ose brenda dy jave me shkrim të na drejtohet me të gjitha kërkesat zyrtare që ne ju kemi drejtu atij”, tha Azemi. /EO
