Ministri i Jashtëm rus, Sergey Lavrov, tha këtë të premte se është i hapur për një telefonatë me Sekretarin e Shtetit të SHBA-ve, Antony Blinken, për të diskutuar një shkëmbim të mundshëm të të burgosurve që përfshin yllin e basketbollit amerikan, Brittney Griner.
Blinken tha të mërkurën se Uashingtoni i kishte ofruar Rusisë një marrëveshje që do të sillte në shtëpi Griner dhe një tjetër amerikan të burgosur, Paul Whelan.
Sipas mediave amerikane, Blinken i ka ofruar Rusisë në shkëmbim tregtarin e armeve, Viktor Bout. Rusi njihet ndryshe si “Tregëtari i Vdekjes”.
Bout u dënua me 25 vjet burg, pasi mbi të rëndonin akuzat e ofrimit të ndihmës në një organizatë terroriste për të vrarë qytetaret amerikane.
Basketbollistja u arrestua më 17 shkurt, pak para se Rusia të dërgonte trupat për të pushtuar Ukrainën. Që atëherë, ylli i Phoenix Mercury dhe fituesja e dyfishtë e medaljes së artë olimpike është mbajtur në burg.
Te bagazhet e saj u gjet vaj kanabisi. Dënimi në Rusi për këtë vepër penale është deri në 10 vjet burg.
Whelan, një ekzekutiv i sigurisë korporative nga Michigan, u dënua me 16 vjet burg për akuzat e spiunazhit në vitin 2020. Ai dhe familja e tij kanë pohuar fuqishëm pafajësinë. Qeveria amerikane i ka denoncuar akuzat si të rreme.
Duke folur gjatë një vizite në Uzbekistan, Lavrov tha se ministria e tij kishte marrë një kërkesë zyrtare nga SHBA-të për një telefonatë, pasi Blinken bëri deklaratën.
Kryediplomati rus tha se ai do të ishte gati sapo të kthehej në Moskë dhe se koha e telefonatës ishte duke u përpunuar.
Lavrov tha se ishte i hapur për të diskutuar shkëmbimin e të burgosurve, edhe pse Ministria e Jashtme nuk ka qenë e përfshirë në diskutimet e mëparshme për këtë çështje.
“Unë do të dëgjoj atë që ai do të thotë”, shtoi Lavrov.
I pyetur të enjten në lidhje me ofertën e SHBA-ve, zëdhënësi i Kremlinit, Dmitry Peskov, u përgjigj se shkëmbimet e të burgosurve zakonisht negocioheshin në mënyrë diskrete prapa skenave. /Albanianpost.com
