Rusia ka krijuar një program armësh në Kinë për të zhvilluar dhe prodhuar dronë sulmues me rreze të gjatë për t’u përdorur në luftën kundër Ukrainës.
Kështu bën të ditur “Reuters”, duke cituar dy burime nga një agjenci e inteligjencës evropiane dhe dokumente të shqyrtuara nga agjencia britanike e lajmeve.
IEMZ Kupol, një degë e kompanisë ruse të armëve në pronësi të Almaz-Antey, ka zhvilluar dhe testuar një model të ri droni të quajtur Garpiya-3 (G3) në Kinë.
Kupol i tha Ministrisë së Mbrojtjes në një përditësim të mëvonshëm se ishte në gjendje të prodhonte drone duke përfshirë G3-in në një fabrikë në Kinë.
Kjo, në mënyrë që armët të mund të vendosen në “operacionin special ushtarak” në Ukrainë, termi që Moska përdor për luftën.
Ministria e Jashtme e Kinës i tha Reuters se nuk ishte në dijeni të një projekti të tillë, duke shtuar se vendi kishte masa të rrepta kontrolli për eksportin e dronëve ose mjeteve ajrore pa pilot (UAV).
G3 mund të udhëtojë rreth 2 mijë kilometra me një ngarkesë prej 50 kilogramësh, sipas raporteve të Kupol në ministri.
Mostrat e G3-it dhe disa modeleve të tjera të dronëve të prodhuar në Kinë janë dorëzuar në Rusi për testime të mëtejshme, përsëri me përfshirjen e ekspertëve kinezë, thanë ata.
Dokumentet nuk identifikojnë specialistët kinezë të dronëve të përfshirë në projektin që ai përshkruan dhe Reuters nuk ishte në gjendje të përcaktonte identitetin e tyre.
Kupol ka marrë në dorëzim shtatë dronë ushtarakë të prodhuar në Kinë, duke përfshirë dy G3, në selinë e tij në qytetin rus të Izhevsk, sipas dy dokumenteve të veçanta të shqyrtuara nga Reuters.
Faturat, njëra prej të cilave kërkon pagesë në yuan, nuk specifikojnë datat e dorëzimit ose nuk identifikojnë furnitorët në Kinë.
Dy burimet e inteligjencës thanë se dorëzimi i mostrave të dronëve në Kupol ishte prova e parë konkrete që agjencia e tyre kishte gjetur se dronët e prodhuara në Kinë i ishin dorëzuar Rusisë që nga fillimi i luftës në Ukrainë.
Ata kërkuan që as ata dhe as organizata e tyre të mos identifikoheshin për shkak të ndjeshmërisë së informacionit. Ata kërkuan gjithashtu që të mbahen disa detaje në lidhje me dokumentet, duke përfshirë datat e tyre të sakta. /Albanianpost.com /Reuters/
