Kush është Olaf Scholz që drejton socialdemokratët, fitues në zgjedhje
Me fundin e epokës Merkel, suksesi tani i takon social-demokratëve në Gjermani nën drejtimin e Olaf Scholz. Ata u renditën të parët në zgjedhjet e së dielës me 25.7% të votave.
Por kush është Olaf Scholz, kandidati i cili arriti të sfidonte partinë e kancelares gjermane dhe ta çonte partinë e tij në një rezultat ‘kokë më kokë’ me CDU e cila tashmë prej vitesh e kishte thuajse të sigurt fitoren e saj?
Scholz ka qenë ministër i financave dhe zëvendëskancelar i Merkel në “koalicionin e madh” të konservatorëve dhe anëtarëve të Partisë Social Demokratike që ajo duhej të mblidhte për të formuar qeverinë në 2017.
Edhe pse shpesh etiketohet “i mërzitshëm”, 63-vjeçari njihet si njeri i veprave se sa i fjalëve , të cilit mund t’i besohen detyra të rëndësishme.
Ai shquhet për përvojën e tij 20-vjeçare politike ku ka shërbyer në disa nga zyrat më të larta në nivel lokal dhe kombëtar.
Gjatë pandemisë, Scholz u përgëzua nga Fondi Monetar Ndërkombëtar për masat e tij, pasi mbrojti ekonominë gjermane dhe krijoi një buxhet të balancuar duke e shpëtuar vendin e tij nga efektet më të rënda të masave të koronavirusit.
Po aq i qetë, i ditur dhe serioz sa vetë Merkel, Scholz ishte kandidati më i besueshëm përballë rivalëve të tij. Socialdemokrati thotë se Gjermania duhet të shkojë në një drejtim tjetër nga ai që ka ndjekur nën drejtimin e kancelares gjermane .
Me gjithë entuziazmin për shkak të fitores partia e tij nuk do të ketë numrat për të qeverisur vetëm dhe do t’i duhet që të krijojë një koalicion me parti të tjera.
