Cak i hajnave shumë herë kanë qenë dhe vazhdojnë të jenë veturat, të cilat qytetarët nuk po kanë siguri t’i lënë as në oborret e shtëpisë e garazhet e tyre. Të tilla raste janë shumë të shpeshta dhe ndodhin shpesh edhe në hapësira e parkingje publike.
Një rast i tillë ka ndodhur edhe të shtunën pasdite, në fshatin Babush në Ferizaj, ku një shofer kërkoi ndihmën e Policisë, pasi nuk e gjeti veturën ku e kishte parkuar.
Sinjali mëson se pasi viktima e raportoi rastin, Policia u aktivizua, me ç’rast vetura u gjet në një lagje të Prishtinës, të dielën në mëngjes.
Burimet nga Prokuroria thonë se pas identifikimit të personit të dyshuar, i njëjti doli të jetë një pacient i Entit Special në Shtime, i cili kishte arritur të ikë nga ky institucion.
Sipas informacioneve të para, bëhet fjalë për B.A., i cili e kishte vjedhur veturën dhe më pas është larguar nga Ferizaj në drejtim të kryeqytetit.
Në lidhje me rastin, Prokurori i Shtetit ka urdhëruar të iniciohet rasti, ndërsa i dyshuari të kthehet sërish në Institutin special./Sinjali/
