Ministri i Shëndetësisë Rifat Latifi u prit në Ankara nga homologu i tij nga Turqia Fahrettin Koca, ku temë diskutimi ishte vazhdimi i bashkëpunimit mes dy shteteve në sektorin e shëndetësisë.
Latifi, gjatë diskutimeve me ministrin Koca, e informoi atë për shtatë shtyllat e transformimit të shëndetësisë së Kosovës, duke shprehur optimizmin për ndryshim rrënjësor të sistemit me prioritet gjithmonë pacientin.
Po ashtu, theks të veçantë në këtë takim iu dha çështjes së shkëmbimit të përvojave ndërmjet dy shteteve në digjitalizimin e shërbimeve shëndetësore, në fuqizimin dhe avancimin e kapaciteteve njerëzore të specializuara si dhe përmirësimin e infrastrukturës dhe modernizimin e spitaleve të Kosovës.
Të dy ministrat në këtë takim u pajtuan për formimin e një grupi punues, me ekspertë nga Kosova dhe Turqia, të cilët do të bashkëpunojnë ngushtë për konkretizimin dhe jetësimin e bashkëpunimit në projekte të ndryshme shëndetësore.
Latifi e ftoi homologun e tij turk që ta vizitojë Kosovën në mënyrë që të thellohet edhe më tej bashkëpunimi mes dy vendeve.
Ministri i Shëndetësisë i Turqisë e siguroi ministrin kosovar se shteti turk do ta ndihmojë sistemin shëndetësor të Kosovës në proceset e transformimit.
Sa u përket shtatë shtyllave, të cilat Latifi i përmendi në këtë takim, Koca shprehu mbështetjen e tij të pa rezervë aty ku është nevoja që shteti turk mund të ndihmojë.
Po ashtu, ai tha se më shumë kënaqësi e pranon ftesën e ministrit Latifi për ta vizituar Kosovën dhe premtoi se shumë shpejtë do ta realizojë një vizitë të tillë.
/KlanKosova/
