Microsoft do të investojë 400 milionë dollarë në Zvicër, tha kompania të hënën, me paratë që do të shkojnë për zhvillimin e infrastrukturës së saj të “cloud computing” dhe Inteligjencës Artificiale.
Kompania amerikane e teknologjisë njoftoi investimin në një takim të ministrit zviceran të Ekonomisë, Guy Parmelin dhe nënkryetarit të saj Brad Smith në Bernë.
Microsoft, i cili punëson 1,000 njerëz në Zvicër, nuk dha detaje se sa vende pune do të krijonte investimi.
Megjithatë, siç është thënë më tej, paratë do të përdoren për të zgjeruar dhe përmirësuar katër qendrat e saj të të dhënave pranë Gjenevës dhe Cyrihut, duke iu përgjigjur kërkesës në rritje për shërbime të Inteligjencës Artificiale dhe “cloud computing në Zvicër”.
Zgjerimi do t’u shërbejë klientëve ekzistues dhe të rinj dhe do të lejojë që të dhënat të mbeten brenda kufijve zviceranë – një kërkesë e rëndësishme për sektorë si kujdesi shëndetësor, financat dhe qeveria.
Microsoft do të zgjerojë gjithashtu punën e saj në partneritet me kompanitë e vogla dhe të mesme dhe do të shtojë përpjekjet e trajnimit për të ndihmuar njerëzit të përdorin Inteligjencën Artificiale dhe mjetet dixhitale.
“Zvicra ka krijuar një nga ekosistemet kryesore të inovacionit në botë, duke kombinuar kërkimin e nivelit botëror me aplikacionet e botës reale”, tha Smith në një deklaratë. /Telegrafi/
