Ministria e Shëndetësisë ka bërë të ditur se fëmijët e moshës 12-15 vjeç që duan të vaksinohen kundër COVID-19, terminin për vaksinim duhet t’ua bëjnë prindërit e tyre nëpërmjet platformës “E-Kosova”.
Ditë më parë, MSH-ja njoftoi se është aprovuar rekomandimi për imunizim për fëmijët mbi 12-vjeç, me prioritet sipas indikacioneve shëndetësore.
“Meqë bëhet fjalë për fëmijë me sëmundje kronike, prindi mund të aplikojë për ta nga kategoria ‘me sëmundje kronike’, por mund të shkojë në QKMF ta caktojë edhe fizikisht terminin për vaksinim, duke qenë që fëmijët me indikacione shëndetësore janë me prioritet”, thuhet në një sqarim të MSH-së për KosovaPress.
MSH-ja po ashtu ka thënë se interesimi i kategorisë deri në 20 vjeç është rritur dukshëm dhe se brenda kësaj kategorie ka studentë, teknikë e infermierë dhe kategori të tjera, pa i përjashtuar edhe ata 12-15 me sëmundje kronike.
/Reporteri/
