Shtetet e Bashkuara i kanë “rishikuar” komponentët që po i furnizojnë Ukrainës, por nuk e kanë ndaluar ndihmën, tha kryeministrja italiane Giorgia Meloni më 4 korrik.
“Shtetet e Bashkuara nuk e kanë ndaluar furnizimin me armë dhe mbështetjen për Ukrainën, ato kanë rishikuar vendimin për të furnizuar komponentë specifikë… (kjo është) e rëndësishme, por shumë e ndryshme nga mosangazhimi total amerikan që është raportuar”, tha Meloni, duke folur në një forum.
Presidenti i SHBA-ve, Donald Trump, më 3 korrik mohoi se Washingtoni ka ndaluar furnizimin me armë për Kievin, mes raporteve të medias për një ndalim të dërgesave.
Zëdhënësi i Pentagonit, Sean Parnell, konfirmoi më 2 korrik se një pjesë e ndihmës ushtarake për Ukrainën është ndalur, ndërsa Departamenti i Mbrojtjes i SHBA-ve po kryen një shqyrtim të dërgesave të ndihmës së huaj.
