Ministri i Mbrojtjes Armend Mehaj i shoqëruar nga zëvendësministri Shemsi Syla, priti sot në takim ambasadorin e Shqipërisë në Kosovë, Qemal Minxhozi, të shoqëruar nga atasheu i ri i mbrojtjes, Altin Kurti.
Përmes një njoftimi për media u bë e ditur se në këtë takim u bisedua lidhur me masat dhe veprimet e nevojshme që në mënyrë sa më efektive të realizohet Plani i bashkëpunimit dypalësh në fushën e mbrojtjes.
“Bashkëpunimi i fuqishëm në mes të dy shteteve tona në fushën e mbrojtjes, përveç interesit të përbashkët kombëtar, është edhe me interes shumë i lartë për paqen, sigurinë dhe stabilitetin e rajonit e më gjerë”, u shpreh ministri Mehaj.
Ndërkohë, ambasadori Minxhozi e rikonfirmoi mbështetjen e plotë të Shqipërisë për ngritjen dhe avancimin e institucioneve të Kosovës, e në veçanti të Ministrisë së Mbrojtjes.
Në anën tjetër, Mehaj e falënderoi ambasadorin për mbështetjen e pakursyer të Shqipërisë nëpër të gjitha fazat e shtet-ndërtimit që ka kaluar dhe po kalon vendi.
/KlanKosova.tv/
