Prej kohësh është thënë se 10 mijë hapa në ditë është numri magjik që nevojitet për të qëndruar në formë dhe të shëndetshëm.
Por një studim i ri tregon se më pak se 5 mijë mund të jenë të mjaftueshëm për të parë një përfitim.
Analiza e më shumë se 226 mijë njerëzve në mbarë botën tregoi se 4 mijë hapa ishin të mjaftueshme për të filluar zvogëlimin e rrezikut të vdekjes së parakohshme për çdo shkak.
Pak më shumë se 2 mijë e 300 janë të mjaftueshme për të pasur të shëndetshme zemrën dhe enët e gjakut.
Sipas studiuesve, sa më shumë hapa të bëni, aq më shumë përfitime shëndetësore shihen.
Çdo 1 mijë hapa shtesë përtej 4 mijë ul rrezikun e vdekjes së hershme me 15 për qind deri në 20 mijë hapa.
Ekipi nga Universiteti Mjekësor i Lodz-it në Poloni dhe Shkolla e Mjekësisë e Universitetit Johns Hopkins në SHBA zbuloi se përfitimet e ecjes zbatoheshin për të gjitha gjinitë dhe moshat, pavarësisht se ku jetonin.
Megjithatë, përfitimet më të mëdha u panë tek moshat nën 60 vjeç.
Maciej Banach, nga universiteti Lodz, ka thënë se ndërsa numri i barnave të avancuara për trajtim po rritej, ato nuk ishin e vetmja përgjigje.
“Unë besoj se duhet të theksojmë gjithmonë se ndryshimet në stilin e jetës, duke përfshirë dietën dhe stërvitjen, që ishte heroi kryesor i analizës sonë, mund të jenë të paktën po aq, ose edhe më shumë, efektivë në reduktimin e rrezikut kardiovaskular dhe zgjatjen e jetës”.
Sipas të dhënave të Organizatës Botërore të Shëndetësisë, aktiviteti fizik i pamjaftueshëm është përgjegjës për 3.2 milionë vdekje çdo vit – shkaku i katërt më i shpeshtë në mbarë botën.
Përfitime të tjera përfshijnë përmirësimin e shëndetit mendor dhe kohë të rëndësishme larg ekraneve dhe shpërqendrimeve të tjera. /Albanianpost.com
