Mbi katër mijë shqiptarë kanë kaluar kanalin e La Manshit, për të arritur nga Franca në Britani të Madhe.
Kështu ka bërë të ditur gazeta britanike “Daily Mail”, ku theksohet se rritja e numrit të shqiptarëve vjen si pasojë e përdorimit të taktikave të reja nga bandat e trafikimit të njerëzve në Ballkan dhe dobësive në ligjet e ‘skllavërisë moderne’ të Britanisë.
“Shqiptarët paguajnë më shumë dhe u garantohet qëndrimi në Britani. Këta njerëz vijnë në vendin tonë dhe shpesh shmangin largimin duke shfrytëzuar ligjet e skllavërisë moderne”, citohet burimi i gazetës nga ministria e Punëve të Brendshme.
Sipas burimeve të kësaj gazete thuhet se shifrat e personave që kalojnë ilegalisht pritet të rriten ndjeshëm këtë vit, krahasuar me një vit më parë që arritën në nivelin e 28 mijë e 500 emigrantëve.
Deri tani, numri i emigrantëve të paligjshëm që kanë hyrë në Britani ka arritur në 20000, çka do të thotë se 1/5-ta e tyre ishin shqiptarë.
Vetëm gjatë muajve qershor dhe korrik kanë mbërritur një mijë e 75 shqiptarë me varka të vogla.
Në javët edhe muajt e fundit, videot e gomoneve të mbushura me emigrantë janë përhapur gjithmonë e më shumë, ku nuk kanë munguar edhe incidentet në det të hapur.
/Dukagjini/
