Ka shkuar në tërësi në mbi 17 mijë, bilanci i tragjedisë së tërmetit të rënë më 6 shkurt në kufirin midis Turqisë dhe Sirisë, ku 14 mijë viktima janë në radhët turke dhe 3 mijë e 162, nga radhët siriane.
Të plagosur nga ana tjetër, janë mbi 60 mijë persona, teksa edhe numri i godinave të shkatërruara, mes pallateve rezidenciale dhe shtëpive, i afrohet 10 mijëshit.
Hapja e disa korridoreve humanitare me Sirinë, ka qenë po ashtu në plan nga dita e djeshme, për shkak të mungesës së ndihmës që po shkon në zonat veriore, të cilat kontrollohen nga rebelët.
Qeveria e Bashar Al-Assad, pavarësisht se ka bërë thirrje ndërkombëtarisht për ndihma, i cilëson ato ekskluzivitet të strukturave shtetërore dhe i ka përjashtuar rebelët pre tyre.
Kësisoj, hapja e të paktën tre korridoreve humanitare drejt qyteteve veriore siriane, përmes kufirit jugor turk, është parë si i domosdoshëm.
Kushtet e ashpra të motit po rrezikojnë më tej të mbijetuarit dhe ndërlikojnë përpjekjet e shpëtimit, pasi më shumë se 100 pasgoditje kanë goditur rajonin.
Shpresa për të gjetur persona të gjallë, tashmë rreth 70 orë pas ngjarjes, është shumë e zbehtë.
Prej tre ditësh, ekipet e kërkim-shpëtimit kanë punuar pa lodhje për gjetjen e të mbijetuarve nën rrënojat e qyteteve thuajse të rrafshuara, por më së shumti, ata të cilët janë gjetur, kanë qenë trupat e vdekur të njerëzve, për të cilët ka frikë të madhe se mund të jenë edhe më të shumtë.
Procesi i evakuimit po ndodh në kushte të rënda të motit, pasi stuhitë e përhershme të dëborës janë shtuar.
Më pesimistët ndër ekspertët, mendojnë se bilanci tragjik, mundet deri të dyfishohet.
Presidenti turk ka shpallur ndërkohë tre muaj gjendje të jashtëzakonshme, në 10 rajonet e goditura nga tërmeti.
Sa i përket ndihmave të para, rreth 2 mijë e 600 personel (kërkim-shpëtimi dhe mjekësor) janë dërguar në Turqi nga 65 vende të botës, ku pjesë bën edhe Shqipëria, e cila ka çuar 53 personel dhe shtatë mjete për të ndihmuar në operacionet që po zhvillohen.
Ekipi shqiptar, me 53 personel kërkim-shpëtimi dhe mjekë e infermierë, ka nisur menjëherë punën në disa rajone, siç është bërë me dije nga vetë ministri i Mbrojtjes në Shqipëri.
Situata është disi më e vështirë në Siri, ku qytetarëve do t’u duhet t’i besojnë autoriteteve vendore më së shumti, parë edhe pozitën gjeopolitike në të cilën vendi ndodhet dhe mungesën e kontakteve diplomatike me shumicën e vendeve të botës.
Në Turqi ndërkohë, vetëm nga Stambolli, janë dërguar menjëherë 13 mijë personel i kërkim-shpëtimit, për të ndihmuar qytetarët e mbetur nën rrënoja, me shpresën se dikush është ende gjallë.
Tërmeti i parë goditi në orën 04:17 me atë lokale, në një thellësi prej 17.9 kilometrash, pranë qytetit Gaziantep, por në realitet të prekur kanë qenë 10 qytete në tërësi, përfshi edhe Diyarbakir-in.
Mes dhjetëra pasgoditjeve, një tepër e fuqishme ka goditur rreth mesditës, me një magnitudë 7.5 Rihter.
Shumë prej ndërtesave janë shembur dhe qindra ekipe kërkim-shpëtimi ndodhen në terren për të bërë të mundur evidentimin e çdo të mbijetuari, apo trupi që ka humbur jetën.
Në një deklaratë për media, ishte ministri i Brendshëm turk, Suleymon Soylu, ai i cili bëri një bilanc paraprak, duke përsëritur se qytetet e prekura nga ana turke ishin Gaziantep, Kahramanmaras, Hatay, Osmaniye, Adiyaman, Malatya, Sanliurfa, Adana, Diyarbakir dhe Kilis.
Nga ana tjetër, në Diyarbakir, është raportuar nga korrespondetët e medias shtetërore britanike BBC, se një qendër e tërë tregtare është shembur, por nuk dihet nëse brenda saj kishte punëtorë të shumtë apo jo.
Prej anës siriane, raportimet janë më të pakta dhe priten përditësime mbi shifrat e humbjes së jetëve dhe dëmeve të shkaktuara.
Lëkundjet e forta u ndjenë gjithashtu në Liban dhe Qipro. Ndërsa, sizma më të lehta, janë ndjerë edhe në Lindjen e Mesme, me raportime deri në Rripin e Gazës, ku ka pasur tronditje për rreth 45 sekonda.
Turqia bën pjesë në një rrip sizmik, ndër më aktivët në gjithë botën dhe të tilla tërmete, nuk janë të rralla atje.
Në vitin 1999, më shumë se 17 mijë njerëz humbën jetën, pasi një tërmet i fortë goditi veri-perëndimin e vendit.
Në një mesazh të menjëhershëm pas ngjarjes, Erdogan ka premtuar ndihmë për çdo të prekur dhe ka kërkuar solidaritetin e gjithë komunitetit ndërkombëtar.
Këta të fundit janë përgjigjur pozitivisht dhe kanë dërguar grupe të posaçme shpëtimi drejt Turqisë.
/AlbanianPost/
