Mbahet seanca solemne e legjislaturës së re të kuvendit të komunës së Gjakovës

Sot u mbajt seanca solemne inauguruese e legjislaturës së re të kuvendit të komunës së Gjakovës ku seancën e udhëhoqi asambleisti më në moshë Mustafa Domi. Fillimisht të gjithë anëtarët e kuvendit komunal e bën betimin dhe  nënshkruan deklaratën për marrjen e detyrës. Në vazhdim para të pranishmëve e bëri betimin edhe kryetari i zgjedhur i komunës së Gjakovës, Ardian Gjini i cili pastaj me një fjalë rasti i falënderoi qytetarët e komunës së Gjakovës për besimin dhe u zotua që do te jetë në shërbim të qytetarëve edhe gjatë këtij mandati katërvjeçar. Në fjalën e tij para asambleistëve Gjini tha që është gati që 4 vitet e ardhshme të punojë edhe më shumë duke kërkuar edhe bashkëpunimin e të gjithëve sepse vetëm bashkë mund ta bëjnë komunën më të mire tha ai.

Në vazhdim të seancës u propozua edhe zgjedhja e kryesuesit të kuvendit të komunës. Pas procedurave të votimit të fshehtë, me 20 vota pro, 10 kundër dhe 4 abstenime, pra me shumicë të votave u zgjodh Arbënesha Kuqi, kryesuese e kuvendit komunal të Gjakovës. Në fjalën e saj përshëndetëse Kuqi i falënderoi këshilltarët komunal për besimin e dhënë dhe premtoi zbatim të ligjit, korrektësi, paanshmëri si dhe u shpreh se do të jetë bashkëpunuese me të gjithë asambleistët pa dallime partiake.

Ndryshe Asamblea Komunale e Gjakovës ka 35 anëtar: 11 AAK, 10 VV, 5 PDK, 4 PSHDK, 4 LDK dhe 1 Nisma Socialdemokrate.