Ambasadori i Shqipërisë në Uashington, Ervin Bushati, zhvilloi një takim me Sekretarin amerikan Marco Rubio, të cilin e ftoi zyrtarisht të vizitojë Shqipërinë në emër të kryeministrit Edi Rama.
Në një postim në rrjetet sociale, Bushati e përshkroi Rubion si “mik të shqiptarëve” dhe theksoi rëndësinë e marrëdhënieve mes dy vendeve.
“E ftova edhe në emër të një kombi të vogël, por me një zemër të madhe si Nënë Tereza,” shkroi ambasadori, duke nënvizuar mesazhin e Shqipërisë për BE-në: “më shumë dashuri edhe më shumë shërbim me përulësi.”
Rubio pranoi ftesën me kënaqësi, duke e vlerësuar Shqipërinë si një kontribuese të rëndësishme në NATO, veçanërisht pas vizitës së tij të fundit në Hagë.
Bushati përfundoi postimin e tij me një mesazh për 4 Korrikun, duke e quajtur këtë ditë jo vetëm si Ditën e Pavarësisë së SHBA-së, por si “Deklaratën e Lirisë dhe Demokracisë për gjithë botën”. Ai theksoi transformimin e Shqipërisë, nga një diktaturë komuniste në një vend pro-amerikan dhe pro-NATO.
“Shqipëria është një mrekulli e diplomacisë amerikane,” përfundoi ambasadori Bushati. /GazetaSinjali/
