Në zemrën e Parisit, aty ku rrugët ndërthuren me aromën e kafesë dhe historisë, një mrekulli e gjelbër thyen monotoninë e gurit e çelikut. “L’Oasis d’Aboukir”, krijim i botanikut dhe artistit të natyrës Patrick Blanc, ngrihet si një poezi vertikale që i flet qytetit për jetë, frymëmarrje dhe rilindje.
Në një ndërtesë pesëkatëshe të rrethit të dytë, në kryqëzimin e rrugëve Aboukir dhe Petits Carreaux, 7,600 bimë nga 237 specie të ndryshme zënë vend mbi fasadën prej betoni, duke e mbuluar me ngjyra, forma dhe lëvizje, shkruan KultPlus.
Valët diagonale të gjelbërimit duken sikur vallëzojnë mbi muret, si një rishfaqje e pyllit të harruar në zemrën e qytetit.
Patrick Blanc, i njohur si pionier i mureve të gjalla, e konceptoi këtë vepër në vitin 2013, si një homazh për bashkëjetesën midis arkitekturës urbane dhe ekosistemit natyror. Ai i dha jetë një ideje që kalon përtej estetikës – një kujtesë se natyra nuk ikën kurrë, ajo vetëm pret të rikthehet.
E inauguruar gjatë Paris Design Week, “Oazi i Aboukir” nuk është vetëm një instalacion, por një manifest ekologjik i heshtur, që sfidon betonin e qytetit dhe u kujton kalimtarëve se gjelbërimi mund të lulëzojë edhe mbi muret më të ftohta.
Në çdo mëngjes, drita e diellit zbret mbi këtë oazë, e ndriçon si një pikturë e gjallë, një frymë poetike që i jep Parisit një tjetër zemër të butë, të gjelbër dhe plot jetë./KultPlus.com
